بحب أبدا كلامي أول شي أنو أنا شخصيا كتير بحبك بغض النظر عن هويتك أو اسمك...منشان هيك عمبحكي معك من الأساس...بس عندي الك كام سؤال..و إذا مافي مانع بدي أخد من وقتك عالموانة شي 5 دقايق...
يا اخي..يعني أول أسبوعين تلاتة مشينا معك و مع إعلامك ..و قلنا أنو يمكن في فعلا مندسين..و المظاهرات اللي عمنشوفا عالتلفيزيون...كلا كذب و مشاهد مفبركة...
و حاولنا كلياتنا نصدق أنو قوات أمننا و مخابراتنا الباسلة مو هنن اللي عمبقتلوا المتظاهرين ( ياللي ما طلعوا و يللي كلون مع النظام) لأني ما معقول في حدا سوري ما بحب نظامو الممانع المقاوم التقدمي الشريف...
بعدين بدينا نشوفا للمظاهرات بعيوننا و أنت كمان أكيد شفتون ..و طلعتلولنا بقصة المؤامرة البندر سلطانية الجزيرية الحريرية ال بي بي سية الفرانس 24ية إلخ...و كمان مشينا معك...
بس يا أخي بعد أكثر من شهرين و نص..ما بتظن أنو صار صعب شوي على مخنا يمشي معك أكتر من هيك..اي ينعل أخت هالمؤامرة الهوليودية اللي كل هالبني ادمين و الدول بدون يشاركوا فيا ...
يعني معقول أنو البي بي سي و الجزيرة و فرانس 24 و الحريري و بندر و خدام و أردوغان و نتنياهو و الأخوان المسلمين و الاسرائيليين ( يلي رفعوا السلفيين علمون في أول أيام استقلال إمارتون الإسلامية السلفية ) و منظمة العفو الدولية و الفايسبوك و التويتر و الأمم المتحدة و الإتحاد الأوروبي و مندسين لبنان و الفنانين المصريين و العرب و بعض الفنانين السوريين المندسين الخونة و المعارضة السورية بجميع أطيافا ( يللي مالا أي وجود بالداخل أبدا لأني الكل راضي و مبسوط بسوريا ) و الأميركان و الكندية و البريطانيين وأبو نظير ..و ...و...و....
معقول كل هدول يا أخي (منحبك) تأمروا على الرخاء الإقتصادي و الحريات اللامتناهية و الأمن المستتب و المقاومة و السعادة و الحياة السياسية الديموقراطية و التآخي الديني تبع المواطن السوري ؟؟؟بالله معقول ؟؟؟
برجع بعتذر منك عالموانة طبعا...لأني أخدت من وقتك كتير..و بعتذر نيابة عن مخي اللي ما حسن يمشي معك أكتر من هيك..
و برجع أقلك كمان مرة...بحبك...و عاشت سوريا...عاش الوطن...
